Axad, May 17, 2026 (Baidoa Online) -Baarlamaanka Xorta ah ayaa si adag uga hadlay waxa uu ku tilmaamay faragelin muuqata oo Dowladda Turkiga ay ku hayso arrimaha gudaha iyo madax-bannaanida Dowladda Federaalka Soomaaliya. Hadal rasmi ah oo kasoo baxay xubno ka tirsan baarlamaanka ayaa lagu sheegay in tallaabooyinka iyo saameynta sii kordheysa ee Turkiga ay khatar ku yihiin madax-bannaanida siyaasadeed, maamulka qaranka, iyo go’aannada ay leedahay dowladda Soomaaliyeed.
Xildhibaanada Baarlamaanka Xorta ah ayaa sheegay in Soomaaliya ay tahay dowlad madax-bannaan oo leh awood buuxda oo ay ku maamusho arrimaheeda gudaha iyo xiriirrada caalamiga ah, islamarkaana aysan jirin dowlad shisheeye oo xaq u leh inay saameyn toos ah ku yeelato habka siyaasadeed iyo maamulka dalka.
Baarlamaanka ayaa tilmaamay in xiriirka iskaashi ee ka dhexeeya Soomaaliya iyo Turkiga uu muhiim yahay, balse loo baahan yahay in uu ku salaysnaado ixtiraam buuxa oo ku saabsan madax-bannaanida, dastuurka, iyo sharciyada dalka. Waxay xuseen in taageerada caalamiga ah ay noqoto mid lagu xoojinayo hay’adaha dowladda, halkii ay noqon lahayd mid abuureysa ku tiirsanaan siyaasadeed ama saameyn dibadeed.
Sidoo kale, xubnaha baarlamaanka ayaa ugu baaqay Dowladda Federaalka Soomaaliya inay si cad u ilaaliso madaxbannaanida qaranka, isla markaana ay dib u eegis ku sameyso heshiisyada iyo wada-shaqeynta lala leeyahay dowladaha shisheeye si loo xaqiijiyo danaha shacabka Soomaaliyeed.
Dhanka kale, Dowladda Turkiga ayaan weli si rasmi ah uga jawaabin eedeymahaasi. Turkiga ayaa muddooyinkii dambe kamid ahaa dowladaha sida weyn uga taageera Soomaaliya dhinacyada amniga, dib-u-dhiska, caafimaadka, waxbarashada, iyo horumarinta kaabeyaasha dhaqaalaha.
Arrintan ayaa kusoo beegmeysa xilli ay sii kordhayaan doodaha la xiriira saameynta dowladaha shisheeye ay ku leeyihiin siyaasadda Soomaaliya, iyadoo bulshada iyo siyaasiyiinta qaarkood ay ku baaqayaan in la xoojiyo ilaalinta madax-bannaanida iyo go’aan qaadashada qaranka.