Khamiis, May 21, 2026 (Baidoa Online) -Weerar amni oo lagu sheegay in uu ka dhacay degmada Dayniile ayaa sababay hadal-heyn xooggan iyo falcelin siyaasadeed, kadib markii Ra’iisul Wasaarihii hore ee Soomaaliya Hassan Ali Khaire uu si adag u cambaareeyay howlgalkaas.
Kheyre oo qoraal ku baahiyay Facebook ayaa ku eedeeyay ciidamada dowladda in ay fuliyeen falal uu ku tilmaamay “gumaad, jirdil, afduub iyo weerarro ka dhan ah shacabka rayidka ah” intii uu socday howlgal habeennimo ah oo ka dhacay degmada Dayniile.
Waxa uu sheegay in dad rayid ah laga soo kaxaystay guryahooda, laguna xiray si aan la garanayn halka ay ku dambeeyeen qaar kamid ah dadkaas, taas oo uu ku tilmaamay arrin walaac amni iyo mid bini’aadantinimo leh.
Kheyre ayaa sidoo kale ku eedeeyay maamulka Madaxweynaha Hassan Sheikh Mohamud in uu adeegsanayo ciidamo si loo cabsi geliyo shacabka Muqdisho, gaar ahaan dadka ku nool Dayniile, kuwaas oo uu sheegay in ay ka soo horjeedaan waxa uu ku tilmaamay “xadgudubyo iyo barakicin sharci-darro ah.”
Sidoo kale, waxa uu dhaliilay murannada la xiriira dhulka iyo barakicinta ka socda caasimadda, isagoo sheegay in ballanqaadyadii dowladda ee ahaa in la joojin doono arrimahaas aysan wali hirgelin.
Ra’iisul Wasaarihii hore ayaa ugu baaqay ciidamada amniga in aysan ka qeyb qaadan howlgal kasta oo waxyeello u geysanaya shacabka, wuxuuna sidoo kale dalbaday in si degdeg ah loo sii daayo dadka la sheegay in lagu xiray howlgalkaas.
Dowladda Federaalka Soomaaliya ayaan weli ka jawaabin eedeymahan cusub.