Axad , May 31, 2026 (Baidoa Online) -Hay’adda Baarista Federaalka Mareykanka (FBI) ayaa la filayaa inay bilowdo baaritaanno ku saabsan hantida ma-guurtada ah ee Kenya ay ku leeyihiin shaqsiyaad Soomaali ah oo lagu eedeeyay inay xiriir la leeyihiin kiiska musuqmaasuqa lacagaha taageerrada dadweynaha ee ka dhacay gobolka Minnesota ee dalka Mareykanka.
Goobaha ugu horreeya ee baaritaannadu ka bilaabanayaan waxaa ka mid ah guryo qaali ah oo ku yaalla degmada Kileleshwa ee magaalada Nairobi, oo ah meel ay maalgashi ballaaran ku leeyihiin ganacsato Soomaaliyeed.
Wararka ayaa sheegaya in qaar ka mid ah guryahan lala xiriirinayo mid ka mid ah shaqsiyaadka loo xiray eedeymaha la xiriira lunsashada lacagihii loogu talagalay barnaamijyada taageerrada dadweynaha ee Mareykanka. Baarayaashu waxay doonayaan inay ogaadaan in hantidaas lagu iibsaday lacago ka yimid falalka lagu eedeeyay.
Baaritaannada ka socda Nairobi iyo meelaha kale ee ay Soomaalidu ku leeyihiin maalgashiyada ganacsi iyo hanti ma-guurto ah ayaa si dhow loola socdaa, iyadoo la rumeysan yahay inay saameyn ku yeelan karaan shirkado iyo ganacsiyo ay leeyihiin Soomaali ku sugan gobolka Bariga Afrika.