Isniin , May 25, 2026 (Baidoa Online) -Warar dheeraad ah ayaa ka soo baxaya xaalad kacsan oo ka taagan magaalada Baydhaba, kadib markii qaar ka mid ah ciidamada Haramcad ay sameeyeen gadood ballaaran oo ay kaga cabanayaan mushaar la’aan muddo ku dhow laba sano ah.
Ilo-wareedyo kala duwan ayaa sheegaya in ciidamada gadoodsanaa ay xireen Isgoyska Afar-Irdoodka, oo ka mid ah meelaha ugu muhiimsan ee isku xira dhaq-dhaqaaqa ganacsiga iyo isu socodka dadka ee magaalada. Xiritaanka isgoyska ayaa saameyn weyn ku yeeshay isku socodka gaadiidka iyo hawlaha ganacsiga ee aaggaas.
Sida ay sheegayaan dadka deegaanka, xaaladdu waxay sii xumaatay kadib markii la maqlay rasaas goos-goos ah oo ka dhacaysay agagaarka goobta. Ilaa hadda lama xaqiijin khasaaraha ka dhashay rasaastaas, hase yeeshee waxaa jira cabsi weyn oo soo wajahday shacabka iyo ganacsatada ku sugan halkaas.
Wararka qaar ayaa sidoo kale tilmaamaya in goobta loo yaqaan Xero Jaad oo ku dhow isgoyska la bililiqeystay, halkaas oo lagu iibin jiray jaad. Lama hubo ciddii si toos ah uga dambeysay falkaas, mana jiraan faahfaahin rasmi ah oo ka soo baxay hay’adaha amniga.
Dadka deegaanka ayaa sheegay in ciidamada gadoodsani ay cabanayaan mushaar la’aan soo jiitameysay muddo dheer, taasoo sii kordhisay xiisadda iyo isku dhacyada iman kara. Arrintan ayaa muujinaysa cadaadis dhaqaale iyo mid maamul oo sii xoogeysanaya oo saameynaya shaqaalaha amniga.
Illaa iyo hadda, mas’uuliyiinta dowladda iyo saraakiisha amniga ayaan si rasmi ah uga hadlin dhacdadan iyo xaaladda ka taagan magaalada. Waxaa jirta walaac isa soo taraya oo ku saabsan in xaaladdu sii ballaarato haddii aan xal degdeg ah la helin.
Xaaladda Baydhaba ayaa weli kacsan, iyadoo shacabka lagu boorriyay inay ka fogaadaan meelaha xiisaddu ka taagan tahay ilaa ay xaaladdu ka degto.