Khamiis, May 21, 2026 (Baidoa Online) -Wararka laga helayo gobolka Baay ayaa sheegaya in dagaal xooggan uu ka socdo deegaanka Iidow Dhegaal oo hoostaga magaalada Baidoa, iyadoo xaaladda amni ee halkaasi ay sii cakirmeyso.
Iidow Dhegaal ayaa ah deegaan aad ugu dhow Ceel-doon, oo ahayd goobtii ay dhawaan ku dhinteen laba taliye guuto intii lagu jiray dagaallo iyo howlgallo militari oo ka dhacay gobolka.
Dagaalkan cusub ayaa imanaya xilli saacadihii lasoo dhaafay ciidamada Somali National Army ee ku sugan Baydhabo ay wadeen howlgallo amni iyo dhaq-dhaqaaqyo militari oo la xiriira xaaladda sii xumaaneysa ee magaalada iyo deegaannada ku dhow.
Ilo deegaanka ah ayaa sheegaya in la maqlayay rasaas culus iyo hubka noocyadiisa kala duwan, inkastoo aan weli si rasmi ah loo xaqiijin khasaaraha ka dhashay dagaalka socda.
Xiisadda gobolka Baay iyo magaalada Baydhabo ayaa sare u kacaysay maalmihii lasoo dhaafay, kadib markii ay kordheen dhaq-dhaqaaqyada ciidamada iska soo horjeeda iyo muranka siyaasadeed ee ka taagan maamulka Koonfur Galbeed.