Talaado , May 26, 2026 (Baidoa Online) -Ilo xog-ogaal ah ayaa sheegay in Xafiiska Madaxweynaha uu qorsheynayo in si weyn loo kordhiyo ciidamada amniga ee magaalada Muqdisho ka hor Khamiista, taas oo la sheegay in ay tahay tallaabo lagu wajahayo ka hortagga banaanbaxyo la filayo iyo xakameynta dhaqdhaqaaqyada mucaaradka.
Sida ay sheegayaan ilo lagu kalsoon yahay, Madaxweyne Xasan Sheekh Maxamuud ayaa kulan la yeeshay saraakiil amni oo ka tirsan kooxo lagu tilmaamay inay ku dhow yihiin dhinaciisa, isagoo faray inay isu diyaariyaan tallaabooyin ka dhan ah waxa uu ku tilmaamay “mucaarad hubeysan.” Diiradda ayaa la sheegay in ay si gaar ah u saaran tahay laba musharax madaxweyne oo hore uga tirsanaa isbahaysigii Badbaado Qaran.
Qaar ka mid ah hay’adaha amniga ayaan sida la sheegay lagu wargelin qorshahan, iyadoo ay jirto kalsooni darro iyo khilaafyo la xiriira hannaanka doorashooyinka.
Waxaa sidoo kale jira cabsi ah in qorshahan uu keeni karo tallaabooyin lagu beegsanayo ilaalada hubeysan ee la socota musharaxiinta mucaaradka xilliyada banaanbaxyada. Falanqeeyayaal ayaa ka digaya in haddii xaaladdu sii xumaato, ay dhici karaan weerarro lagu qaado guryo ay degan yihiin siyaasiyiin mucaarad ah, taas oo kordhin karta xiisadda amniga ee caasimadda.