Isniin , Juun 8, 2026 (Baidoa Online) -Madaxweynaha Somaliland, Cabdiraxmaan Maxamed Cabdullaahi (Cirro), ayaa la filayaa inuu toddobaadka soo socda booqasho rasmi ah ku tago dalka Israel, sida ay qortay warbaahinta Israel. Wararka ayaa sheegaya in booqashadu ay dhici doonto inta u dhaxaysa 15-ka ilaa 17-ka Juun, iyadoo la filayo inuu kulamo la yeesho Madaxweynaha Israel Isaac Herzog iyo Ra’iisul Wasaaraha Israel Benjamin Netanyahu.
Sida lagu sheegay wargeyska Yedioth Ahronoth, qodobka ugu weyn ee safarka ayaa noqon kara furitaanka safaarad ay Somaliland ka yeelato magaalada Qudus (Jerusalem), taas oo Somaliland ay u aqoonsatay caasimadda Israel.
Ilaa hadda, ma jiro war rasmi ah oo ka soo baxay Somaliland ama Israel oo lagu xaqiijinayo booqashada la sheegay. Wargeyska ayaa sidoo kale xusay in laba safar oo hore oo Madaxweyne Cirro la filayay inuu ku tago Israel dib loo dhigay sababo kala duwan awgood.
Booqashadan la filayo ayaa imaaneysa kadib markii Israel ay noqotay dalkii ugu horreeyay ee si rasmi ah u aqoonsada Somaliland, oo sanadkii 1991 ku dhawaaqday inay ka go’day Soomaaliya. Aqoonsigaas ayaa loo arkay guul diblomaasiyadeed oo weyn oo u soo hoyatay Somaliland, oo muddo ka badan soddon sano raadineysay aqoonsi caalami ah.
Dhinaca kale, Dowladda Federaalka Soomaaliya ayaa si adag uga hortimid xiriirka sii xoogeysanaya ee u dhexeeya Somaliland iyo Israel. Dowladda Soomaaliya waxay ku adkeysatay in Somaliland ay weli qayb ka tahay Jamhuuriyadda Federaalka Soomaaliya, isla markaana aysan aqbalayn tallaabo kasta oo dhaawacaysa madax-bannaanida iyo midnimada dhuleed ee dalka.
Madaxweyne Xasan Sheekh Maxamuud ayaa horey u cambaareeyay qorshaha la xiriira furitaanka safaarad Somaliland ku yeelato Qudus, isagoo ku tilmaamay arrin dhaawacaysa mowqifka Soomaaliya iyo kan dunida Islaamka ee ku aaddan magaaladaas. Soomaaliya ayaa muddo dheer taageereysay xuquuqda shacabka Falastiin iyo in Bariga Qudus uu noqdo caasimadda dowlad Falastiiniyiintu leeyihiin.
Sidoo kale, Ururka Iskaashiga Islaamka (OIC) ayaa horey u muujiyay walaac xooggan oo ku saabsan wararka sheegaya in Somaliland ay safaarad ka furato Qudus, isagoo ku tilmaamay arrintaasi mid xasaasi ah oo khilaaf hor leh abuuri karta.
Haddii booqashadan la xaqiijiyo, waxay noqon doontaa mid ka mid ah tallaabooyinka diblomaasiyadeed ee ugu waaweyn ee Somaliland qaaddo tan iyo markii ay ku dhawaaqday inay ka go’day Soomaaliya, waxaana la filayaa inay saameyn ku yeelato siyaasadda Geeska Afrika iyo xiriirka gobolka.