Sabti , May 16, 2026 (Baidoa Online) -Golaha Wasiirrada Soomaaliya ayaa la filayaa inay Axadda yeeshaan shir degdeg ah oo looga hadlayo dhaqangelinta dastuurka, xilli ay cirka isku sii shareerayaan xiisadaha siyaasadeed ee ka dhashay dhammaadka muddada Madaxweyne Xasan Sheekh Maxamuud oo ku egayd 15-ka May 2026.
Shirkan ayaa imanaya iyadoo kooxaha mucaaradka ay sare u qaadeen cadaadiska ay saarayaan dowladda federaalka, iyagoo ku dhawaaqay inay hadda Xasan Sheekh u aqoonsan yihiin “madaxweyne hore” kadib markii ay dhammaatay muddadiisii dastuuriga ahayd.
Bayaan ay soo saareen Jimcihii ayay hoggaamiyeyaasha mucaaradku ku baaqeen kulan degdeg ah oo qaran si looga hortago waxa ay ku tilmaameen “firaaq siyaasadeed” oo dalka ka dhalan karta. Waxay sidoo kale ka digeen in Soomaaliya ay gashay marxalad hubanti la’aan siyaasadeed oo halis ah, iyagoo ku eedeeyay madaxweynaha inuu doonayo inuu qabto doorashooyin hal dhinac ah oo aan lagu heshiin.
Mucaaradku waxay sidoo kale si adag u diideen hannaanka doorasho ee ay dowladda waddo, iyagoo ku tilmaamay mid “ceeb ah” isla markaana aan haysan heshiis iyo taageero siyaasadeed oo ballaaran.
Ilaa hadda dowladda federaalka si rasmi ah ugama aysan jawaabin hadalladii ugu dambeeyay ee mucaaradka, balse shirka degdegga ah ee Golaha Wasiirrada ayaa la filayaa inuu diiradda saaro saameynta dastuuriga iyo siyaasadeed ee khilaafka sii xoogeysanaya.
Khilaafkan soo ifbaxaya ayaa sare u qaaday walaaca laga qabo xasilloonida siyaasadeed ee Soomaaliya xilli xasaasi ah oo dalka ku jiro. Iyadoo mucaaradku ay diideen sharciyadda hoggaanka hadda jira islamarkaana ay dowladda ku eedeeyeen inay waddo doorashooyin aan loo dhanayn, waxaa sii kordhaya cabsi laga qabo in maqnaanshaha heshiis siyaasadeed oo loo dhan yahay uu sii kala fogeeyo dhinacyada siyaasadda isla markaana uu wiiqo hay’adaha dowliga ah.