Talaado, Juun 16, 2026 (Baidoa Online) -– Dowladda Koonfur Galbeed Soomaaliya ayaa si rasmi ah ugu dhawaaqday in tirada shacabka ku nool deegaannada maamulkaasi ay gaartay 5 milyan oo qof, taas oo loo arko horumar muhiim ah oo dhanka koboca bulshada ah
Mas’uuliyiinta Koonfur Galbeed ayaa sheegay in tiradan cusub ay ka tarjumeyso kororka joogtada ah ee dadka ku nool gobollada iyo degmooyinka maamulka, iyagoo xusay in xogtan ay muhiim u tahay qorsheynta adeegyada bulshada iyo horumarinta kaabeyaasha dhaqaalaha.
Koonfur Galbeed oo ka kooban gobollada Bay, Bakool iyo Shabeellaha Hoose ayaa ka mid ah maamullada ugu dadka badan Soomaaliya, iyadoo leh muhiimad weyn oo dhinacyada beeraha, ganacsiga iyo wax-soo-saarka dalka ah.
Dowladda Koonfur Galbeed ayaa sheegtay in kororka tirada dadka uu sare u qaadayo baahida loo qabo adeegyada caafimaadka, waxbarashada, biyaha, waddooyinka iyo fursadaha shaqo, taas oo u baahan qorsheyn iyo maalgashi dheeraad ah.
Mas’uuliyiintu waxay sidoo kale tilmaameen in xogta cusub ee tirada shacabka ay door muhiim ah ka qaadan doonto qorsheynta horumarinta, qoondaynta kheyraadka iyo dejinta siyaasadaha maamulka ee mustaqbalka.