Axad, Juun 7, 2026 (Baidoa Online) -Ciidamada dowladda Soomaaliya ayaa dib ugu laabtay magaalada Muqdisho kadib hawlgal habeenimo ah oo ka dhacay gobolka Shabeellaha Dhexe, kaas oo sida la sheegay aan gaarin ujeeddooyinkii laga lahaa.
Hawlgalka ayaa lagu beegsaday koox hubeysan oo la rumeysan yahay inay la xiriirto garab ku dhow Wasiir Cabdullaahi Maxamed Nuur. Ciidamada dowladda ayaa u baxay si ay u hub ka dhigaan ama u soo qabtaan xubnaha kooxdaas.
Wararka laga helayo deegaanka ayaa sheegaya in kooxdii la beegsanayay ay ka baxsadeen goobta, iyadoo la tilmaamay in ay ka faa’iideysteen aqoon ay u leeyihiin dhulka iyo waddooyinka deegaanka, taas oo caqabad ku noqotay dhaq-dhaqaaqa iyo isku-duwidda ciidamada dowladda.
Kadib markii hawlgalku uusan guulaysan, saraakiisha hoggaaminaysay ciidamada ayaa lagu soo waramayaa inay amreen in cutubyadii ka qaybgalay hawlgalka ay dib ugu soo laabtaan xarumahooda magaalada Muqdisho.
Sidoo kale, ilo amni ayaa sheegaya in xubnihii hubeysnaa ee la beegsanayay ay haatan ku sugan yihiin deegaanka Cadow Uul ee gobolka Shabeellaha Dhexe.
Ilaa iyo hadda, dowladda Federaalka Soomaaliya kama aysan soo saarin war rasmi ah oo faahfaahinaya hawlgalkan, ujeedkiisa, iyo natiijadiisa rasmiga ah.
Howlgallada amni ee ka socda Shabeellaha Dhexe iyo gobollada ku dhow ayaa sii xoogeysanayay bilihii la soo dhaafay, iyadoo ciidamada dowladda ay wadaan dadaallo lagu xasilinayo deegaannada ay ka jiraan kooxaha hubeysan.