Axad, May 24, 2026 (Baidoa Online) -Hay’adda Socdaalka iyo Jinsiyadda Soomaaliyeed ayaa si dhow ula socotay caqabadaha ku yimid muwaadiniinta Soomaaliyeed ee u socdaalayay Dalka Jamhuuriyadda Carbeed ee Masar maalmihii lasoo dhaafay.
Tani ayaa imaaneysa kadib markii qaar ka mid ah rakaab Soomaaliyeed oo u safrayay dalka Masar ay ku xayirmeen garoonka diyaaradaha ee magaalada Qaahira (Cairo Airport), arrintaas oo dhalisay caro iyo falcelin xooggan oo ka timid shacabka Soomaaliyeed.
Sidaas awgeed, Hay’addu waxay ku wargelinaysaa dhammaan muwaadiniinta Soomaaliyeed in laga bilaabo maanta oo ay taariikhdu tahay 24-ka Maajo 2026, si ku-meel-gaar ah loo hakiyay isticmaalka oggolaanshaha safarka ee loo yaqaan “OK-to-Board” ee dalka Masar.
Hay’addu waxay sidoo kale caddeyneysaa in muwaadiniinta Soomaaliyeed ay dalka Masar ku geli karaan kaliya dal-ku-gal rasmi ah (Visa) oo ay bixiso Qunsuliyadda Jamhuuriyadda Carbeed ee Masar.
Hay’adda Socdaalka iyo Jinsiyadda waxay xoojinaysaa sida ay uga go’an tahay ilaalinta nidaamka safarka, badqabka muwaadiniinta, iyo adkaynta xiriirka saaxiibtinimo ee ka dhexeeya Jamhuuriyadda Federaalka Soomaaliya iyo Jamhuuriyadda Carbeed ee Masar.
