Isniin, Juun 15, 2026 (Baidoa Online) -Golaha Ammaanka ee Qaramada Midoobay ayaa galinka dambe ee maanta yeelanaya kulan gaar ah oo looga arrinsanayo xaaladda Soomaaliya, xilli ay jiraan is-afgarad la’aan la xiriira qodobada ugu muhiimsan ee shirka lagu soo qaadayo.
Sida ay sheegayaan ilo diblomaasiyadeed, Dowladda Federaalka Soomaaliya ayaa dadaal ugu jirtay in kulanka diiradda lagu saaro oo keliya taageerada amniga iyo saadka ee howlgalka Midowga Afrika ee AUSSOM, iyadoo laga fogaanayo doodaha ku saabsan xaaladda siyaasadeed ee gudaha dalka, gaar ahaan muranka muddo-kororsiga iyo dagaalladii dhawaan ka dhacay qaybo ka mid ah Soomaaliya.
Kulanka, oo ay muddeysay Qaramada Midoobay, ayaa si weyn diiradda u saari doona mustaqbalka howlgalka AUSSOM iyo qaabka loo heli karo dhaqaalaha lagu sii wadi karo howlgalkaas. Wakiillo ka socda Qaramada Midoobay iyo Midowga Afrika ayaa lagu wadaa inay warbixinno rasmi ah ka horjeediyaan xubnaha Golaha Ammaanka.
Wararka ayaa sidoo kale tilmaamaya in Dowladda Soomaaliya, iyadoo taageero ka helaysa qaar ka mid ah dalalka Afrika ee xubnaha ka ah Golaha Ammaanka, ay isku dayday in la yareeyo doorka qaar ka mid ah masuuliyiinta Qaramada Midoobay ee ka hadlaya xaaladda Soomaaliya. Si kastaba ha ahaatee, guddoomiyaha Golaha Ammaanka ee bishan, Colombia, iyo Boqortooyada Ingiriiska ayaa go’aamiyay in Ergayga Gaarka ah ee Qaramada Midoobay ee Soomaaliya, Raisedon Zenenga, uu ka qeybgalo kulanka isla markaana warbixin ka bixiyo xaaladda dalka.
Kulankan ayaa ku soo aadaya xilli hay’adaha Qaramada Midoobay iyo Midowga Afrika ee ka howlgala Soomaaliya ay wajahayaan caqabado dhaqaale oo sii kordhaya. Xafiiska Taageerada Qaramada Midoobay ee Soomaaliya (UNSOS) ayaa la sheegay inuu u baahan yahay ku dhowaad $130 milyan si uu u sii wado adeegyada saadka iyo taageerada howlgalada amniga, halka howlgalka AUSSOM uu wajahayo hoos-u-dhac miisaaniyadeed oo lagu qiyaasay $38.5 milyan.
Sidoo kale, weli ma jiro is-afgarad buuxa oo ay gaareen dalalka deeq-bixiyeyaasha waaweyn ee ku saabsan qaabka mustaqbalka loo maalgelinayo howlgalka AUSSOM, iyadoo waddamo ay ka mid yihiin Mareykanka iyo Boqortooyada Ingiriiska ay qabaan walaacyo la xiriira qorshayaasha la soo jeediyay.
Qiimeynno hordhac ah oo loo gudbiyay Golaha Ammaanka ayaa muujinaya in kooxaha hubeysan ay weli leeyihiin awood ay ku fuliyaan weerarro iyo dhaqdhaqaaqyo amni darro abuuri kara. Saraakiil caalami ah ayaa ka digaya in haddii aan la helin dhaqaale ku filan, ay taasi halis gelin karto qorshaha kala-guurka amniga Soomaaliya, isla markaana ay dib u dhac ku keeni karto guulihii laga gaaray howlgalada lagu xoreeyay deegaanno badan oo dalka ka tirsan.
Natiijada kulanka maanta ayaa la filayaa inay saameyn ku yeelato jihada taageerada caalamiga ah ee Soomaaliya, xilli dalka uu wajahayo caqabado amni, dhaqaale iyo siyaasadeed oo is-biirsaday.