Jimco , Juun 5, 2026 (Baidoa Online)-Madaxweynihii hore ee Soomaaliya Sheekh Shariif Sheekh Axmed iyo ciidamadii la socday ayaa loo ogolaaday inay sii socdaan, kadib markii laga qaaday isbaarooyinkii lagu hor istaagay ee ka jiray degmada Shangaani ee magaalada Muqdisho, sida ay sheegeen ilo deegaanka ah.
Horumarkan ayaa yimid kadib markii Jimcihii ay dhacday xiisad amni oo xooggan, taas oo kolonyada Sheekh Shariif lagu hor istaagay iyadoo ay wateen ciidamo sare oo amni iyo milatari ah. Goobjoogayaal ayaa sheegay in kolonyada la joojiyay isla markaana ay saacado badan ku xayirnaayeen waddooyinka magaalada, iyadoo ciidamada ammaanku ay xirnaayeen qaybo ka mid ah waddada.
Dhacdadan oo hore loo soo tebiyay ayaa ka dhacday xilli kolonyadu ka soo ambabaxday deegaanka Mirinaayo, kadibna lagu hor istaagay markii ay galeen degmada Shangaani. Waqtigaas lama helin wax war rasmi ah oo ka soo baxay dowladda, waxaana socda dadaallo dhexdhexaadin ah oo lagu doonayay in xaaladda lagu dejiyo.
Ilo xog-ogaal ah ayaa hadda xaqiijiyay in la qaaday isbaarooyinkii iyo xannibaadihii waddooyinka, taasoo u ogolaatay Sheekh Shariif iyo ciidamadii la socday inay sii wataan safarkooda iyagoo aan wax carqalad ah la kulmin. Kolonyada ayaa hadda ku sii jeeda guriga madaxweynihii hore ee Muqdisho.
Ma jiro weli war rasmi ah oo ka soo baxay dowladda Federaalka Soomaaliya oo sharxaya sababta keentay in kolonyada markii hore la joojiyo iyo waxa sababay in mar dambe loo ogolaado inay sii socdaan. Arrintan ayaa weli dhalisay su’aalo la xiriira hab-raaca amniga iyo isuduwidda hay’adaha dowladda.
Dhacdadan ayaa si weyn looga hadal hayaa Muqdisho, iyadoo ay ku soo beegantay xilli ay jiraan xiisado siyaasadeed iyo dooddo ku saabsan xiriirka ka dhexeeya dowladda iyo mucaaradka.